கொல்கத்தா சிறப்பான பந்துவீச்சு - டெல்லிக்கு எதிராக இலக்கு 143

இந்தப் போட்டி டெல்லி அருண் ஜேட்லி மைதானத்தில் நடைபெறுகிறது.

இதுவரை 10 போட்டிகளில் விளையாடியுள்ள டெல்லி கேபிட்டல்ஸ் அணி 4 வெற்றிகளும், 6 தோல்விகளும் பெற்றுள்ளது. புள்ளிப் பட்டியலில் 7வது இடத்தில் இருக்கிறது. கொல்கத்தா நைட் ரைடர்ஸ் அணி 9 போட்டிகளில் 3 வெற்றிகள் மற்றும் 5 தோல்விகள் பெற்றிருக்கிறது. ஒரு போட்டி மழையால் ரத்து செய்யப்பட்டது. 7 புள்ளிகள் பெற்றிருக்கும் அந்த அணி 8வது இடத்தில் இருக்கிறது.

டாஸ் வென்ற கொல்கத்தா நைட் ரைடர்ஸ் அணி பந்துவீச்சை தேர்வு செய்தது. அந்த அணியில் எந்த மாற்றமும் செய்யப்படவில்லை. டெல்லி கேபிட்டல்ஸ் அணியில் கருண் நாயர் மற்றும் நடராஜன் ஆகியோருக்குப் பதிலாக விப்ராஜ் நிகம் மற்றும் முகேஷ் குமார் ஆகியோர் சேர்க்கப்பட்டனர்.

முதலில் பேட்டிங் செய்த டெல்லி கேபிட்டல்ஸ் அணியின் 20 ஓவர்கள் முடிவில் 8 விக்கெட்டுகளை இழந்து 142 ரன்கள் எடுத்தது. அந்த அணியின் தொடக்கவீரர் பதும் நிசன்கா அதிகபட்சமாக 50 ரன்கள் எடுத்தார். கேகேஆர் பௌலர்களில் அதிகபட்சமாக அனுகூல் ராய் மற்றும் கார்த்திக் தியாகி ஆகியோர் தலா 2 விக்கெட்டுகள் கைப்பற்றினார்கள்.

தடுமாறிய டெல்லி பேட்டர்கள்

டெல்லி கேபிட்டல்ஸ் அணிக்கு அதன் தொடக்க வீரர்கள் கே.எல்.ராகுல் மற்றும் பதும் நிசன்கா ஆகியோர் ஓரளவு நல்ல தொடக்கம் ஏற்படுத்திக்கொடுத்தார்கள். இந்த இணை 5 ஓவர்களில் 49 ரன்கள் எடுத்தது. 14 பந்துகளில் 23 ரன்கள் எடுத்த கே.எல்.ராகுல், கார்த்திக் தியாகி பந்துவீச்சில் கேமரூன் கிரீன் வசம் கேட்ச் கொடுத்து ஆட்டமிழந்தார்.

ராகுலின் விக்கெட்டுக்குப் பிறகு டெல்லி அணியின் வேகம் வெகுவாகக் குறைந்தது. 6வது ஓவரில் 6 ரன்கள் மட்டும் வர, பவர்பிளேவை 55/1 என முடித்தது கேபிட்டல்ஸ்.

வேகமாக ரன் எடுக்க சிரமப்பட்ட நித்திஷ் ராணா 8 ரன்கள் (10 பந்துகள்) எடுத்திருந்த நிலையில் கேமரூன் கிரீன் பந்துவீச்சில் ஆட்டமிழந்தார். அதற்குப் பிறகு கொல்கத்தா நைட் ரைடர்ஸ் ஸ்பின்னர்கள் ஆதிக்கம் செலுத்தத் தொடங்கினார்கள். அனுகூல் ராய் மற்றும் சுனில் நரைன் பந்துவீச்சில் அடுத்தடுத்து விக்கெட்டுகள் விழத் தொடங்கின.

சமீர் ரிஸ்வி 3 ரன்களில் நரைன் பந்துவீச்சில் வெளியேறினார். ஒருபக்கம் விக்கெட்டுகள் வீழ்ந்தாலும் நிலைத்து நின்று விளையாடி அரைசதம் அடித்தார் பதும் நிசன்கா. அரைசதம் அடித்த அடுத்த பந்திலேயே அவரை வெளியேற்றினார் அனுகூல் ராய். அதே ஓவரில் டிரிஸ்டன் ஸ்டப்ஸ் விக்கெட்டையும் கைப்பற்றினார் அனுகூல். அதனால் 89/5 என்று தடுமாறியது டெல்லி கேபிட்டல்ஸ்.

தொடர் விக்கெட் வீழ்ச்சியின் காரணமாக அக்‌ஷர் பட்டேல் - அஷுதோஷ் ஷர்மா ஜோடி மிகவும் நிதானமாக விளையாடியது. இந்த ஜோடி 6வது விக்கெட்டுக்கு 46 பந்துகளில் 39 ரன்கள் எடுத்தது. 22 பந்துகளில் 11 ரன்கள் மட்டுமே எடுத்து வைபவ் அரோரா பந்துவீச்சில் வெளியேறினார் அக்‌ஷர் பட்டேல்.

கடைசி கட்டத்தில் அஷுதோஷ் ஷர்மா ஓரளவு அதிரடி காட்டியதால் டெல்லி கேபிட்டல்ஸ் அணி 8 விக்கெட்டுகள் இழப்புக்கு 142 ரன்கள் எடுத்தது. 28 பந்துகளில் 39 ரன்கள் எடுத்த அஷுதோஷ் கடைசி ஓவரில் ஆட்டமிழந்தார். கார்த்திக் தியாகி மற்றும் அனுகூல் ராய் ஆகியோர் தலா 2 விக்கெட்டுகள் வீழ்த்தினார்கள்.

டாஸில் என்ன நடந்தது?

டாஸ் வென்று பந்துவீச்சை தேர்வு செய்ததற்கான காரணம் பற்றிப் பேசிய கேகேஆர் கேப்டன் அஜிங்க்யா ரஹானே, "கடந்த 3-4 போட்டிகளில் நாம் பார்த்தது எல்லாமே சற்று வித்தியாசமான ஆட்டங்களாக இருந்தன - 264 ரன்கள், 160 ரன்கள், மற்றும் RCB-க்கு எதிரான குறைந்த ஸ்கோர் கொண்ட ஆட்டம் என பலவற்றை பார்த்தோம். அதனால் ஆடுகளம் எப்படி இருக்கிறது, அது எப்படி செயல்படுகிறது என்பதைப் பார்த்து விளையாடுவது முக்கியம் என்று நினைத்தேன். அப்போதுதான் பேட்டிங் செய்வது எளிதாகும். அதே சமயம், டாஸ் வெல்வது அல்லது தோற்பது என்பது முக்கியமல்ல, 40 ஓவர்களும் சிறப்பான கிரிக்கெட்டை விளையாடுவதே முக்கியம். உண்மையைச் சொன்னால், இந்த ஆடுகளத்தைக் கணிப்பது கடினம். முதலில் பந்துவீசினாலும் அல்லது பேட்டிங் செய்தாலும், ஆட்டத்தைத் தொடங்கும் போது சூழலை மதிப்பிட்டு, அதற்கு ஏற்ப செயல்படுவது அவசியம்." என்று கூறினார்.